यस चेतनामूलक सामग्रीमा, हाम्रो अध्ययन र कार्य–अनुभवको आधारमा, हामीले केही यस्ता तरिकाहरू पहिचान गरेका छौँ, जसलाई उपयोग गरेमा बौद्धिक अपाङ्गता भएका बालबालिकालाई सिक्नका लागि राम्रैसँग मद्दत गर्न सकिन्छ। यस सामग्रीमा हामी बौद्धिक अपाङ्गतालाई राम्रोसँग चिन्ने र बुझ्ने उपायदेखि लिएर, बौद्धिक अपाङ्गता भएका बालबालिकालाई घरमा वा विद्यालयमा सिक्नका लागि मद्दत गर्ने विधि र तरिकाहरूको बारेमा चर्चा गर्नेछौँ। यो सामग्री हामीले मुख्य रूपमा अभिभावक र शिक्षकहरूलाई लक्षित गरेर बनाएको हो, तर बौद्धिक अपाङ्गताको बारेमा बुझ्न चाहने वा यस्ता बालबालिकालाई मद्दत गर्न चाहने जो–कोहीलाई पनि उपयोगी हुनेछ भन्ने विश्वास गर्छौँ।
